தமிழ் மதுரம்..!

எனக்குச் சின்ன வயசிலை இருந்து நாடகம் நடிக்க வேணும், நாடகம் எழுத வேணும் என்றெல்லாம் ஆசை இருக்கும். நாங்கள் பாடசாலையில் படிக்கும் போது ஹர்சனும் நானும் இணைந்து நாடகங்கள் தயாரித்து அரங்கேற்றி மகிழ்வோம். சில நேரம் ஹர்சன் தனியாக நாடகம் செய்வான். சில நேரம் நான் தனியாக நாடகம் உருவாக்கி வகுப்பில் உள்ள சக நண்பர்களை நடிக்க வைத்து மகிழ்வோம். இன்று ஹர்சனுடன் பேசும் போது இந்த நினைவு மீட்டல்களை மீட்டிப் பார்க்கையில் ’இழந்த பருவங்கள் மீண்டும் வராதா’ என்று நாங்கள் நினைத்து ஏங்குவதுண்டு?




சில நேரம் உடனடியாகவும் நாடகம் செய்ய வேண்டிய தேவை ஏற்படும். ஏதாவது நகைச்சுவை நாடகமோ இல்லையென்றால் சீரியஸான விடயங்களோ எங்கள் நாடகங்களின் கருப்பொருளாகும். எந்தவித ‘ஸ்கிறிப்ட்‘ எழுத்துருவாக்கமும் இன்றி நானும் ஹர்சனும் இணைந்து உடனடியாக எமது நாடகத்தின் விடயங்களை ஏனைய நடிக நண்பர்களுக்குச் சொல்லி அவர்களுக்குப் புரிய வைத்து வெற்றிகரமாக மேடையேற்றி மகிழ்ந்திருக்கிறோம்.



பிற்காலத்தில் கல்விப் பொதுத் தராதர சாதரண வகுப்பிற்கு புதிய பாடத்திட்டத்திற்கு அமைவாக நாடகமும் அரங்கியலும் அறிமுகப்படுத்தப்பட்ட போது இந்த நாடகத்தின் மீது கொண்ட பற்றுறுதி காரணமாக நானும் ஹர்சனும் இன்னும் பல நண்பர்களும் நாடகமும் அரங்கியலையும் O/L வகுப்பில் எடுத்துத் தேறியுமிருந்தோம். ‘நான் நல்லாப் பாடுவேனாம். எனக்கு பாடுவதற்கு ஏற்ற நல்ல குரல் இருக்குதாம்’ என்று என்னுடைய அவா அடிக்கடி என்னுடன் கதைக்கும் போது சொல்லுவா.. (காக்கைக்கும் தன் குஞ்சு பொன் குஞ்சு தானே??)
ஏன் நான் நாடகம் எடுத்தனான் என்று கேட்டுக் கிண்டல் பண்ணுவா?? தொடர்ந்தும் சங்கீதத்தைப் படிச்சிருக்கலாம் தானே என்றும் சொல்லுவா?? நான் நாடகத்தின் மீது தான் எனக்குப் பற்று அதிகம் என்று சொல்லிச் சமாளித்து விடுவேன்? அட...ஒவ்வோர் சுரவரிசையையும் ஆரோகண, அவரோகண ஏற்ற இறக்கத்திலை மாற்றிப் பாடுற விசயம் மாதிரி எனக்கு வேதனையான விசயம் வேறை ஒன்றும் இல்லை? பிறகு எப்பிடி நான் சங்கீதம் படிச்சிருக்க முடியும்??



இப் பதிவில் நான் தரவிருக்கிற நாடகம் தான் ‘ஒஸ்ரேலிய மாப்பிளையும் ஆறுமுகத்தாற்றை பொட்டையும்! இந்த நாடகத்தை ஒஸ்ரேலியத் தமிழ் ஒலிபரப்புக் கூட்டுத் தாபனத்திற்காக நான் எழுதியிருந்தேன்? ஏற்கனவே இங்கு பதிவிடப்பட்ட ’கனடாக்காற மாப்பிளையும் கதிர்காமற்றை பொட்டையும்..! எனும் பதிவினைப் படித்த எங்களின் அறிவிப்பாளர் திருமதி சாந்தினி அவர்கள் இதனை நாடகமாக ஒஸ்ரேலிய நடை முறை வாழ்விற்கு ஏற்ற வகையில் மாற்றினால் என்ன என்று கேட்டா? அவாவின் எண்ணக் கருத்துக்கு அமைவாகவே அந்தப் பதிவு ஒரு சில மாற்றங்களோடு இங்கே நாடகமாக அரங்கேறியுள்ளது.



இது ஒலிப்பதிவு செய்யப்படுகின்ற என்னுடைய முதலாவது நாடகம் என்பதால் நிறையத் தவறுகளும், குறைகளும் இருக்க வாய்புக்கள் உள்ளன. ஆகவே குறை நிறைகளைச் சுட்டிக் காட்டினால் அவை கண்டிப்பாக எனக்கு ஊக்கமளிப்பதாகவே அமையும். உங்களது ஆக்க பூர்வமான எண்ணக் கருத்துக்களும், விமர்சனங்களும் தான் என்னை மென்மேலும் சிறப்புற நாடகங்களைப் படைக்க வழி வகுக்கும் என்பது என்னுடைய தாழ்மையான வேண்டுகோள்.



இன்றைய புலம்பெயர் சமூக அமைப்பில் ஏற்படுகின்ற நிஜங்களின் பிரதிபலிப்பினைத் தாங்கியே இந்த நாடகம் அமையப் பெற்றுள்ளது. சமூகத்தில் நடக்கும் ஒரு சில விடயங்களை வைத்தே இந்த நாடகத்தை எழுதியுள்ளேன்? என்ன யோசிக்கிறீர்கள்? யார் யாரெல்லாம் நாடகத்தில் நடித்திருக்கிறார்கள் என்றா?? நாடகத்தைக் கேட்டுப் பாருங்கள்? அவை எல்லாம் புரியும்???